ಕವಿಯ ಗುನ್ಹೆ

ಪುಂಡರು ಹಳಿಯ ಕೀಲು ಕಿತ್ತು ಒಯ್ದಿದ್ದಾರೆ
ರೈಲು ಇನ್ನೇನು ಬರಲಿದೆ
ಅಷ್ಟರಲ್ಲಿ ಕಾಳಜಿಯ ಕಣ್ಣಿಗಿದು ಬಿದ್ದರೆ ಒಳಿತು

ಬಾಲ್ಕನಿಯಿಂದ ಮುಂದೆ ಬಾಗಿ ನಿಂತಿರುವ ಮಗು
ಇನ್ನೇನು ಭಾರಕ್ಕೆ ತಡೆಗೋಲು ಬಿರಿಯಲಿದೆ
ಅಷ್ಟರಲ್ಲಿ ಯಾರ ಕೈಕೊಕ್ಕೆಗಾದರೂ ಸಿಲುಕಿದರೆ ಒಳಿತು

ಸೇತುವೆಯ ಮೇಲೆ ನಿಂತಿರುವ ಒಬ್ಬಂಟಿ ಹುಡುಗಿ
ಅವಳ ತಲೆಯೊಳಗಿನ ಜೇನುಹುಟ್ಟು ಒಡೆದಿದೆ
ಅಷ್ಟರಲ್ಲಿ ಅನಾಮಿಕರಾದರೂ ಅಲ್ಲಿ ಕಂಡರೆ ಒಳಿತು

ಕುರುಡನ ಊರುಗೋಲು ಚಪ್ಪಡಿಯ ತಟ್ಟಿದೆ
ಅದರ ಬಿರುಕು ಕೊನೆಯ ಹೆಜ್ಜೆಗೆ ಕಾಯುತ್ತಿದೆ
ಅಷ್ಟರಲ್ಲಿ ಯಾರಾದರೂ ಅಡ್ಡ ಬಂದರೆ ಒಳಿತು

ಇದೆಲ್ಲಾ ನನ್ನ ಕಣ್ಣಿಗೆ ಕಂಡಿದೆ
ನನ್ನ ದೃಷ್ಟಿ ಜಗದ ಘಾತಕ್ಕೆ ಸಿಲುಕಿದೆ
ನನ್ನ ಬದಲು ಇಲ್ಲಿ ಬೇರೆ ಯಾರಾದರೂ ಇದ್ದಿದ್ದರೆ ಒಳಿತು.